काठमाडौं । गौरीशंकर गाउँपालिकामा हुनगइरहेको उप–निर्वाचनका अभियान स्वरुप काठमाडौंमा आगामी मंसिर १ गते बृहत भेला हुने भएको छ । नेकपा एमाले गौरीशंकर पालिका सम्पर्क मञ्चको बैठकले काठमाडौंमा रहेका गौरीशंकरका स्थायी मतदाता र उम्मेदवार बीच परिचय र भेटघाट गर्ने उद्धेश्यले बृहत भेला गर्न लागेको हो ।
पालिका सम्पर्क मञ्चको सोमबार बसेको बैठकमा पूर्वमन्त्री एवं दोलखाका पार्टी इन्चार्ज पार्वत गुरूङले उपनिर्वाचनको अभियान सम्बन्धमा निर्देशन दिनुहुदै मंसिर १ गते उम्मेदवार र मतदाता बीच भेटघाट र परिचयात्मक कार्यक्रम गर्न लागेको बताउनु भयो । पूर्वमन्त्री गुरुङले गौरीशंकरको उपनिर्वाचनमा सबै नेता तथा कार्यकर्ताहरु लाग्न निर्देशन दिनुहुदै नेतृत्वलाई जिम्मेवारी समेत प्रदान गर्नुभयो ।
पूर्वमन्त्री गुरुङले गौरीशंकरको उपनिर्वाचनमा एमालेको जित सहजै हुने र जुनसुकै आपतकालिन हुरी वतास आएपनि नछेकिने बताउनुभयो । बैठकमा गौरीशंकरका पार्टी कार्यकर्ता तथा नेतृत्वहरुलाई प्रशिक्षण दिनुहदै उपनिर्वाचनमा सबै तह र तप्काबाट केन्द्रित हुन समेत जिल्ला, प्रदेश र संघको नेतृत्वलाई आह्वान गर्नुभयो ।
उक्त बैठकले तोकेको जिम्मेवारीहरुमा मतदाताको बास्तविक तथ्याङ्ग संकलन गरिने, काठमाडौंबाट गौरीशंकरसम्म मतदातालाई यातायातको व्यवस्था गर्ने, पालिकाको वडा नम्बर १ देखि ९ सम्मको टिम लिडरको जिम्मेवारी लगायत विविध विषयमा छलफल गरिएको थियो ।
उपनिर्वाचन प्रचारप्रसारको लागि सदरमुकाम चरिकोट र काठमाडौंमा मिडिया डेक्स स्थापना गर्ने पनि निर्णय गरेको छ । मिडिया डेक्सको लागि फिल्डबाट प्रत्यक्ष रिर्पोट संकलन गरी सामाजिक सञ्जाल तथा मिडियाहरुमा प्रचारप्रसार गरिनेछ ।
उपनिर्वाचनको लागि नेकपा एमालेबाट उपाध्यक्ष पदको उम्मेदवार सिफारिस भएपछि उमा शेर्पाले कात्तिक २१ गतेबाटै घरदैलो अभियान सुरु गरेकी छन् । शेर्पाले आफ्नै वडा गौरीशंकर गाउँपालिका–७ मार्वुबाट घर दैलो अभियान सुरु गरेकी हुुन् । मार्वुबाट सुरु गरिएको घरदैलो अभियान चंखु, सुरी, झ्याँकु र जुँगु हुदै वडा नं ८ खारे पुगेको छ । चुनावी घरदैलो मतदाता भेटघाट अभियान २८ गते सिमीगाँउ हुदै २९ गते टासिनाम पुगेर पहिलो चरणको अभियान समापन हुने अभियानका संयोजक स्वयम बहादुर खड्काले बताउनु भयो ।
गौरीशंकर गाँउपालिकाको तत्कालिन उपाध्यक्ष श्यामसुन्दर तामाङको २०८० असार ३१ गते ह्रदयघात भई उपचारको क्रममा निधन भएपछि रिक्त पदको लागि आगामी मंसिर १६ गते उपनिर्वाचन हुन लागेको हो । उपनिर्वाचनमा भाग लिनका लागि जिल्लाका राजनीतिक दलहरुले उम्मेदवार सिफारिस गरी प्रचारप्रसार अभियान समेत सुरु गरिसकेको छ ।
त्यसैगरी, निर्वाचन आयोगको तालिका अनुसार गौरीशंकरमा उपनिर्वाचनको लागि मंसिर २ गते उम्मेदवार मनोनयन दर्ता हुनेछ ।
