दोलखा । गौरीशंकर गाउपालिकामा हुुन लागेको उपनिर्वाचनमा आफ्नो उम्मेदवार विजयी गराउन प्रमुख राजनीतिक दलहरु सक्रिय भएका छन् । उपनिर्वाचनका लागि मनोनयन दर्ता मिति नजिकिदै गर्दा प्रमुख राजनीतिक दलहरुको प्रचारप्रसार एवं घरदैलो अभियानमा सक्रियता भएका हुन् ।
निर्वाचन आयोगको समयतालिका अनुसार आगामी मंसिर २ गते उम्मेदवारी मनोनयन दर्ता हुनेछ । जसका लागि प्रमुख राजनीतिक दलहरु नेकपा एमाले, नेपाली कांग्रेस र एकीकृत नेकपा माओवादी केन्द्र लगायतले पार्टीबाट उम्मेदवार घोषणा गरी घरदैलो अभियान सुरु गरेका छन् ।
नेकपा एमाले दोलखाले उमा लुङ्गेली मगर शेर्पालाई उम्मेदवार बनाउने निर्णय गरेपछि घरदैलो गर्ने अभियानको संयोजन गर्न जिल्ला कमिटीका सचिव स्वयम बहादुर खड्काको नेतृत्वमा काक्तिक २१ गतेदेखिनै सुरु गरेका छन् । अभियानका टोलिमा जिल्ला नेताहरु जंग गुरुङ, फुरलाक्पा शेर्पा, देवराम बुढाथोकी, विन्दु गुरुङ पालिका कमिटीका अध्यक्ष मिङ्गुर शेर्पा लगायतका नेता तथा कार्यकर्ताहरु परिचालित भएका छन् ।
एमालेको कार्तिक २१ गते मार्वुबाट सुरु भएको पहिलो चरणको घरदैलो अभियान कार्तिक २९ गते टाँसिनाममा पुुगेर सकिने र दोस्रो चरणको अभियान मंसिर २ गते मनोनयन दर्तापछि सुुरु हुने अभियानका संयोजक एवं एमाले दोलखाका सचिव स्वयम बहादुर खड्काले बताए ।
एमालेले यसअघि मार्वु, चंखु र सुुरीमा सकिएको र शनिवार (कार्तिक २४ गते) झ्याँकुमा अभियान भएको अभियानका सदस्य जंग गुरुङ्गले बताए । अब २५ र २६ गते जुँगु, २७ गते खारे, २८ गते सिमिगाँउ र २९ गते टाँसिनाममा पहिलो चरणको अभियान समापन हुने गुरुङले बताए ।
उपनिर्वाचनको उपाध्यक्ष पदका लागि नेपाली कांग्रेसले पासदिकी शेर्पा तामाङलाई उम्मेदवार बनाएको छ । नेपाली कांग्रेस, नेकपा माओवादी केन्द्र, नेकपा एकिकृत समाजवादी, राप्रपा लगायतले समेत उम्मेदवार घोषणासंगै घरदैलो र भेटघाट अभियान तिब्र बनाएका छन् ।
नेपाली कांग्रेसले हृदयाघातका कारण निधन भएका उपाध्यक्ष श्यामसुन्दर तामाङको धर्मपत्नी पासदिकी शेर्पा तमाङलाई उम्मेदवार बनाउने निर्णय गरेको छ । कांग्रेसले प्रचारप्रसार एवं घरदैलो अभियानको क्रममा सभापति बर्मा लामासंगै बागमति प्रदेशका अर्थमन्त्री कुुन्दनराज काफ्ले लगायत जिल्लाकाका नेताहरु सक्रिय रहेका छन् ।
नेकपा माओवादी केन्द्रले निमलेकी शेर्पालाई उम्मेदवार बनाउने निर्णय गरेको छ । माओवादी केन्द्रका जिल्ला इन्चार्ज एवं बागमति प्रदेशका पूर्व बन मन्त्री विशाल खड्का, विश्वास कार्की लगायतका नेता तथा कार्यकर्ताहरु घरदैलो अभियानमा सक्रिय रहेका छन् ।
नेकपा एकिकृत समाजवादीले रविना खड्कालाई उम्मेदवार बनाउने निर्णय गरेको छ । उपचुनावका लागि राप्रपाले समेत उम्मेदवार घोषणासंगै घरदैलो र भेटघाट अभियान तिब्र बनाएका छन् ।
गौरीशंकर गाँउपालिकाका उपाध्यक्ष श्यामसुन्दर तामाङको हृदयाघातका कारण २०८० असार ३१ गते उपचारका क्रममा निधन भएको थियो । सो रिक्त रहेको उपाध्यक्ष पदमा आगामी मंसिर १६ गते उपनिर्वाचन हुन लागेको हो ।
